Monitorimi i Autoritetit të Mediave Audiovizive për muajin qershor ka sjellë reagimin e kryeministrit Edi Rama. Sipas të dhënave të AMA-s, partitë opozitare kanë pasur më shumë hapësirë në edicionet kryesore informative televizive sesa Partia Socialiste. Nga 402 minuta e 47 sekonda mbulim total për partitë politike gjatë këtij muaji, opozita ka zënë rreth 64% të kohës televizive, ndërsa Partia Socialiste rreth 36%. Këto shifra janë përdorur nga kryeministri Edi Rama si kundërargument ndaj kritikave për kontrollin e medias dhe akuzave për mungesë pluralizmi. “Këto dy pasqyra, të cilat vijojnë të tregojnë me fakte kokëforta të bazuara në matje jo në perceptime, se Shqipëria nuk ka asnjë lidhje me autokracitë e me kinse regjimet - ku korbat dhe sorrat politike e mediatike e fusin përditë e përnatë me krrakrratë e tyre - vendosa t’i postoj vetëm si pasqyra të mjerimit intelektual të dështakzemërakëve, të cilët i kërkojnë papushim kudo (e sidomos te unë) arsyet pse “regjimi” nuk përmbyset, përveçse aty ku arsyeja është: Te mjerimi i tyre që sheh regjim se s’di këndim të Shqipërisë”