Pas një qëndrimi thuajse dy mujor në spitale dhe vetëm 20 ditë nga ndërhyrja e fundit kirurgjikale në Qendrën Spitalore Universitare, një 52-vjeçar nga Durrësi, përdorues heroine, përfitues i metadonit dhe mbartës i virusit HIV, iu nënshtrua një tjetër ndërhyrjeje në këmbë në Spitalin Rajonal të Durrësit. Aktualisht ai ndodhet në reanimacion, nën kujdesin e ekipit mjekësor. Pacienti ka kaluar një periudhë të gjatë trajtimi spitalor, këtë verë. Pas ndërhyrjes në QSUT, ai u kthye në spitalin e Durrësit nga ku doli, sipas mjekëve, 3 ditë më parë, në prani të vëllait, po gjendja e tij u përkeqësua dhe u rikthye sërish në Spitalin e Durrësit ku iu nënshtrua ndërhyrjes së radhës. Sipas mjekëve, nëse gjendja e tij do të vijojë të jetë e qëndrueshme, pacienti pritet të transferohet në pavion. “Pas ndërhyrjes që ka bërë sot, pavarësisht nga lloji i operacioni gjendja është stabël, është i zgjuar në dhomën e terapisë intensive”, u shpreh mjeku. Megjithatë, rasti i 52-vjeçarit nxjerr në pah edhe një problem që shkon përtej trajtimit mjekësor. Pacientët që jetojnë me varësi, sëmundje kronike apo në kushte të rënda sociale, shpesh nuk kanë mbështetje familjare pas daljes nga spitali. Për ta, kujdesi nuk përfundon me mbylljen e plagës, por kërkon rehabilitim, ndjekje dhe mbështetje nga shërbimet sociale e institucionet përgjegjëse, në mënyrë që të mos mbeten të braktisur sapo lënë spitalin.