Situata e zjarreve në vend vijon të mbetet problematike, me 11 vatra ende aktive nga 39 të raportuara gjatë 24 orëve të fundit. Tre vatra janë nën mbikëqyrje, ndërsa 25 janë shuar plotësisht. Në operacionet për përballimin e flakëve janë angazhuar 881 forca operacionale, 75 automjete zjarrfikëse dhe 340 efektivë të Forcave të Armatosura. Ndërhyrjet nga ajri janë kryer me helikopterët e Forcës Ajrore dhe një avion Air Tractor. Situatat më të vështira janë regjistruar në Fier dhe Himarë. Në zonën Drizë–Vadhizë–Peshtan–Levan, ndërhyrja nga toka dhe ajri ka bërë të mundur shmangien e rrezikut për banesat, ndërsa operacioni vijon. Në Himarë, në lagjen “1 Maji”, u angazhuan rreth 300 forca operacionale dhe 171 efektivë të ushtrisë. Nga zona u evakuuan 36 persona, ndërsa flakët dogjën gjashtë banesa, tre prej të cilave të banuara. Intensiteti i zjarrit është ulur dhe banesat nuk janë më në rrezik. Vatra aktive ka edhe në Tiranë, Dibër, Lezhë, Shkodër, Durrës dhe Vlorë. Në Dajt, Zall-Herr, Vajkal, Lundre, Mallunxë, Gallatë dhe Kalivaç, autoritetet raportojnë se aktualisht nuk ka rrezik për zonat e banuara. Për sot parashikohet angazhimi i 380 ushtarakëve, dy helikopterëve dhe një avioni Air Tractor.