Kryetari i Kuvendit të Serbisë, Ivica Daçic tha se është mirë që Dhomat e Specializuara të Kosovës, me seli në Hagë, kanë nisur të punojnë. Me kwtw pohim, ai iu referua aktakuzës se Dhomave të Specializuara për krime lufte kundër ish-presidentit të Kosovës, Hashim Thaçi, ish-kryetarit të Partisë Demokratike të Kosovës, Kadri Veseli, shefit të Grupit Parlamentar të Lëvizjes Vetëvendosje, Rexhep Selimi, dhe ish-kryetarit të Kuvendit të Kosovës, Jakup Krasniqi. Ai u shpreh se Dhomat e Specializuara janë themeluar nga nevoja për një hetim ndërkombëtar të krimeve "të kryera nga Ushtria Çlirimtare e Kosovës, jo vetëm kundër popullit serb, por edhe kundër qytetarëve të kombësive të tjera, përfshirë shqiptarët e Kosovës, kështu që të gjithë që kanë kryer krime, duhet të mbajnë përgjegjësi". Me tej doli me pretendimin se "krimet kundër serbëve në Kosovë nuk janë sanksionuar deri më tani". Por, "ka një rrugë të gjatë nga aktakuza deri te vendimi", deklaroi Dacic duke theksuar nevojën për mbrojtjen e dëshmitarëve. Dhomat e Specializuara dhe Zyra e Prokurorit të Specializuar - që ndryshe njihen edhe si Gjykata Speciale – janw duke hetuar krimet e pretenduara të pjesëtarëve të ish-UCK-sw, të kryera kundër pakicave etnike dhe rivalëve politikë që nga janari i vitit 1998 e deri në dhjetor të vitit 2000. Këto krime të pretenduara përmenden në një raport të Këshillit të Evropës, të vitit 2011, autor i të cilit është senatori zviceran, Dick Marty.