Kryeministri Edi Rama thotë se ka ardhur koha për ti bërë ndryshime taksës progresive. Këtë deklaratë kryeministri e bëri pasi u pyet se përse shtresa e mesme paguan taksë 23 përqind, më të lartë se pasanikët e vërtetë. Megjithatë ai nuk dha një shifër se sa do të jetë rishikimi i taksës progresive. Kryeministri gjeti rastin të sulmojë projektin e Partisë demokratike për taksën e sheshtë. Për sa i përket rindërtimit kryeministri sqaroi se sa është vlera e parave të disbursuara nga fondet e premtuara një vit më parë në konferencën e donatorëve. Nga gati 1.2 miliardë euro deri më tani janë marrë grante 289.5 milion euro, për 32 projekte aktive me donator dhe hua 150 milion euro. Në vijim të vitit 2021 janë parashikuar 6 miliardë lekë për objekte arsimore 6.8 miliardë lekë për banesat kolektive, 1.4 miliardë lekë hartim projektesh, 14.6 miliardë lekë grante rikonstruksioni dhe 1.9 miliardë lekë infrastrukturë publike.