Këngëtarja e “Nothing Compares 2 U”, aktivistja irlandeze Sinéad O’Connor mbylli sytë të mërkurën në moshën 56-vjeçare. Familja e artistes njoftoi me trishtim lajmin e ndarjes nga jeta dhe kërkoi privatësi në këtë kohë të vështirë. Menjëherë nisën homazhet nga artistët vendas e botëror për këngëtaren, ndërsa kryeministri irlandez Taoiseach Leo Varadkar në mesazhin e ngushëllimit tha se muzika e O’Connor “u pëlqye në mbarë botën dhe talenti i saj ishte i pakrahasueshëm”. Sinéad O’Connor ngjiti shkallët e karrierës në vitin 1990 me këngën “Nothing Compares 2 U”, e cila kryesoi shumë shpejt listat në shumë shtete dhe qëndroi për katër javë në krye të Billboard Hot 100, duke fituar tre nominime për Grammy. Në karrierën e suksesshme, ajo nxori 10 albume, që thyen rekorde në SHBA dhe Mbretërinë e Bashkuar. Për Sinéad O'Connor, muzika ishte terapia që do ta shëronte nga fëmijëria e trazuar. Pas natyrës së saj rebele, fshihej abuzimi që kishte përjetuar në fëmijëri nga e ëma. Tragjedi në jetën e saj ishte humbja e të birit, që vrau veten në moshën 17-vjeçare, ndërsa më pas u përball me probleme të shëndetit fizik e mendor, përfshirë bipolaritetin. Talenti krijues e shndërroi në yllin e muzikës pop, por nuk fshehu asnjëherë shpirtin e saj rebel. Muzikën e përdori për të përcjellë mesazhe të fuqishme, si protestat përmes teksteve kundër abuzimit seksual ndaj fëmijëve në kishës katolike. Ajo nuk hezitoi të griste një foto të Papës në një televizion amerikan. Sinéad O’Connor do të mbahet mend si këngëtarja, që me zërin e saj kërkonte të dëgjohej e të fliste për plagët e shoqërisë.