Lefter Leka, 82 vjeç, nga Orikumi i Vlorës, jeton çdo ditë me frikën se shtëpia e tij do t’i rrëshkasë nga kodra. Prej 19 vitesh ai dhe 12 familje të tjera jetojnë mbi një rrëshqitje toke që po avancon dita-ditës, pranë rrugës “Jul Cezari”. Çdo shi i fortë u merr pak nga toka, dhe sot para shtëpive u ka mbetur vetëm një rrip i hollë dhe i rrezikshëm, ku ecin me kujdes që të mos rrëzohen.Nuk mund të hyjnë makina, ambulanca ndalet poshtë kodrës, ndërsa gruan e Lefterit, e paralizuar prej vitesh, ai e ka transportuar disa herë me barrelë për t’i bërë analizat. Pas 19 vitesh ankesa, bashkia u dha një përgjigje pozitive: në buxhetin e vitit 2025 është parashikuar ndërtimi i rrugës. Por… deri tani nuk është bërë asgjë. Lefteri ka vetëm një frikë: “Mos më rrëshkasë shtëpia dhe mos më skadojë fondi!”