Klubi i Partizanit ka prezantuar mëngjesin e sotëm futbollistin e tyre më të ri, Ferhan Hasani. Shqiptari nga Maqedonia e Veriut, në prani të drejtorit të përgjithshëm të Partizanit Olsi Rama dhe një pranie të jashtëzakonshme të mediave në konferencë, pranoi se ka pasur ofertë dhe nga klubi i Tiranës. Megjithatë, në fund vendosi të firmoste për të kuqtë e kryeqytetit. Hasani ka nisur që sot stërvitjen me ekipin që drejtohet nga Ilir Daja por për aktivizimin e tij mesa duket duhet që tifozët të presin duke qenë se i duhet një periudhe kohore të arrijë ritmin e skuadrës. Kjo ishte një tjetër fitore nga ana e Partizanit që pasi mundi Tiranën në Derbi pak ditë më parë këtë herë e mundi edhe në merkato duke i marrë futbollistin që ishte objektiv i presidentit Refik Halili.