Policia greke ka arrestuar gjatë orëve të mbrëmjes të së djelës, këngëtarin e famshëm Notis Sfakianakis. Sipas informacioneve të deritanishme,këngëtari i famshëm ishte duke udhëtuar me automjetin e tij në aksin që lidh qendrën e Athinës me zonën bregdetare Vuliagmeni, në momentin që u ndalua prej një patrulle të policisë e cila po kryente kontrolle për masat anti covid në kryeqytetin e vendit. Pasi u ndalua, policët konstatuan sjellje të çuditshme prej këngëtarit të famshëm,ndaj dhe vendosën të kontrollojnë mjetin. Në çantën e tij u gjet një pistoletë të cilën këngëtari aq shumë i debatuar për sjelljen e tij raciste dhe antisemite e mbante pa leje, si dhe një sasi lënde narkotike, e dyshuar kokainë. Dyshohet se në momentin e ndalimit, këngëtari i famshëm grek,kishte përdorur sasi të lëndës narkotike. Ai u ndalua dhe pritet të dërgohet në gjykatë për masë sigurie gjatë paradites të së sotme. Notis Sfakianakis është gjendur shpesh herë në qendër të kritikave për sjelljet e tij raciste dhe ksenofobe. Ai ka fyer të huajt që jetojnë në vend,dhe është shprehur pro organizatës kriminale “Agimi i Artë”,deklaratë të cilën pak më vonë e tërhoqi.