Pavarësisht qëndrimit të Presidentit dhe kundërshtimit të deputetëve të opozitës së re, Komisioni i Ekonomisë ka miratuar sërish ligjin për Taksat Kombëtare të kthyer për rishqyrtim, ku parashikohet heqja e taksës së rentës minerare për 3 vite rresht. Përfaqësuesit e Presidentit kanë kërkuar nga deputetët e komisionit që të marrin parasysh propozimin për përjashtimin vetëm për 1 vit, diçka që nuk ka marrë miratimin e tyre. Teksa hedhin poshtë argumentat e kreut të Shtetit që ky ligj është klientelist dhe favorizon një grup të ngushtë biznesesh, përfaqësuesit e qeverisë deklarojnë se ky përjashtim do të ndihmojë rimëkëmbjen e sektorit. Sipas draftit të Financave i cili u kthye pak ditë më parë nga Presidenti renta minerare do të zerohej deri në fund të 2023 për mineralet metalore që përpunohen dhe eksportohen jashtë, teksa më pas do të bëhej në masën 1/3 e normës së rentës. Por edhe pse deputetët e komisioneve të posaçme propozonin ngrirjen e saj vetëm për 2021, mazhoranca votoi në parlament variantin fillestar të saj.