Fiks Fare denoncoi abuzimet e tenderit për blerjen e zarfeve dhe letrës së pyetjeve për Këshillimin Kombëtar. Këto zarfe u shpërndanë në muajin janar të qindra mijëra familje në të gjithë Shqipërinë, duke u angazhuar punonjësit e Postës Shqiptare. Sipas dokumenteve që disponon Fiksi, procedurat e tenderit u zhvilluan në fund të muajit janar 2022, ndërkohë që njoftimi i fituesit dhe lidhja e kontratës u firmosën në fillim të muajit shkurt! Në muajin janar 2022, qeveria shqiptare linçoi projektin e Këshillimit Kombëtar. Në adresë të qytetarëve shkoi një zarf, brenda të cilit kishte me dhjetëra pyetje, të cilat pasi plotësoheshin, dërgoheshin sërish me një zarf tjetër me postë në adresë të Këshillit të Ministrave. "Është një nismë që unë e mbështes, që synon përfshirjen e publikut në vendimmarrje" tha Ervin Bushati, administrator i Postës Shqiptare. Z.Bushati, dikur deputet i PS-së, tha se një nismë e tillë po bëhet edhe në Angli, po "ne jemi para!". Sipas një vëzhgimi të Fiks Fare, në profilet në rrjete të Postës Shqiptare dhe të z.Ervin Bushati, rezulton se ky i fundit ka bërë disa statuse në muajin janar se punonjësit e postës kishin shkuar derë më derë për të shpërndarë këto zarfe. Postime të tilla ka deri në fund të janarit. Por, në redaksinë e emisionit Fiks Fare mbërritën disa informacione se, megjithëse zarfet e Postës Shqiptare, u shpërndanë në muajin janar 2022, procedurat e tenderit janë bërë në fund të muajit janar! Sipas një dokumenti që disponon redaksia e Fiks Fare, procedura konkurruese e tenderit është bërë në datën 27 janar 2022. Tenderi ka pasur një vlerë rreth 24 milionë lekë të rinj, ndërkohë që ka qenë me objekt "blerje zarfe A4, zarfe A5/B5, etiketa adezive dhe printim të pyetësorit dhe letrës shoqëruese". "Burimi i financimit nga fondi i ardhur nga Agjencia për Dialog dhe Bashkëqeverisje për zbatimin e programit të Këshillimit Kombëtarë" thuhet në dokumentet e Postës Shqiptare, ndërkohë që në këtë tender ka marrë pjesë vetëm operatori ekonomik "Albamedia" me një ofertë ekonomike 23.114.000 lekë pa TVSH, ose me TVSH shuma shkon në rreth 27 milionë lekë të rinj.