Pas kësaj situate në Spitalin e Janinës, familja vjen në Shqipëri dhe kërkon në Prokurorinë e Sarandës zhvarrimin e babait të tyre për t'i bërë analizën e ADN-së. Bëjnë kallëzim në prokurori, teksa çështja hetohet nga prokurori Ilir Hoxha. Pas disa muajsh hetime, prokurori pushon hetimet, teksa arsyeton se "familjarët kanë paraqitur në Gjendjen Civile një dokument nga Spitali i Janinës" që i ndjeri kishte vdekur nga Covidi. Për këtë arsye, prokurori nuk pranoi zhvarrimin. Sipas dokumenteve që disponon Fiks Fare, në datën 16 shkurt 2022, Prokuroria e Sarandës i ka dërguar familjes Apostoli vendimin për mosfillimin e procedimit penal. Në dokumentin prej vetëm 2 faqesh, prokurori Ilir Hoxha shkruan se prej datës 11 dhjetor 2020, z.Kristo Apostoli, kish qenë i shtruar pranë Njësisë së Terapisë Intensive Covid pranë Spitalit të Përgjithshëm Universitar të Janinës Greqi. Pasi shtetasi ka ndërruar jetë, trupi i tij "në arkivol të mbyllur" është transportuar në Shqipëri, ku nga familjarët është varrosur në fshatin Pezë. Gjatë këtij procesit, familjarët e të ndjerit nuk e kanë hapur arkivolin, rrethanë për të cilin bashkëshortja e të ndjerit kallëzon se "e kishim porosi nga shteti grek". Prokurori shkruan se familjarët kanë dërguar një dokument të Spitalit të Janinës në Gjendjen Civile në Mesopotam, Finiq, ku vërtetohej se "z.Kristo Apostoli kishte vdekur". Më tej shkruan se, familjarët kanë dyshime në lidhje me vdekjen dhe kërkojnë ndihmë për zbardhjen e ngjarjes pasi nuk e dinë çfarë ka brenda arkivolit. Madje, ata kërkuan edhe zhvarrosjen! Prokurori ka arsyetuar se dokumentet e paraqitura nga familjarët në Gjendjen Civile janë të pakontestueshme, ku faktohet se i ndjeri ka vdekur nga COVID 19. Telefonatat e Spitalit të Janinës, për prokurorin, nuk janë të mjaftueshme për të identifikuar elementë të ndonjë figure të veprës penale.