Në datën 23 dhjetor 2022, Fiks Fare transmetoi problematikën e invalidit Andrea Qosja, të cilit iu hoq paketa higjeno-sanitare. 46 vjeçari është prej 20 vitesh në karrocë me rrota, pasi ka humbur të dyja këmbët. "Iu drejtova Fiks Fare se pas 20 vitesh jam me KEMP dhe me status të përhershëm të invalidit, paraplegjik dhe tetraplegjik. E kam marrë kempin përherë, pa asnjë problem. Librezën e kam marrë në vitin 2017 dhe thotë ‘përgjithmonë’, ku përfitoj edhe paketën higjieno-sanitare. Pas transmetimit të kësaj problematike, në redaksinë e "Fiks Fare" telefonoi një biznes, për t'i ardhur sadopak në ndihmë Andreas. "Pamë kronikën e Fiksit dhe administratori i firmës sonë donte të dhuronte një makinë elektrike për këtë invalid, për t'i plotësuar sadopak lëvizjen e përditshme" tha punonjësja. Firma "Sallaku" dhe Fiks Fare udhëtojnë sërish në fshatin Mjekës në Elbasan, kësaj herë për t'i dhuruar makinën Andreas. "Falenderoj shumë firmën dhe 'Fiks Fare' që mu gjend pranë në këto momente të vështira" tha Andrea. Por, ky nuk ishte lajmi i vetëm i mirë për 46-vjeçarin! Ditën që Fiks Fare e vizitoi, në të njëjtën banesë, kishte shkuar edhe komisioni i KEMP-it. "Pas transmetimit të kronikës dhe pas grevës sonë 3 ditore, komisioni i KEMP-it erdhi në banesë dhe riverifikoi gjendjen time" tha Andrea. Më pas, Fiksi i dha çelësin e makinës. "Faleminderit dhe gëzuar të gjithëvë" përfundoi invalidi.