Fiks Fare denoncoi mbrëmjen e së martës problematikën e ujit të pijshëm në fshatin turistik të Linit në Pogradec, banorëve të së cilit iu premtua 24 orë ujë në ditë, por aktualisht kanë 24 orë në muaj! Por, edhe investimi në 2020-ën i një shume prej 16 milionë lekësh të reja nuk e ka zgjidhur këtë problematikë, pasi firma fituese i ka lënë punimet në mes, teksa ka përfunduar edhe afati i zbatimit të kontratës së tenderit. Në redaksinë e emisionit investigativ u ankuan dhjetëra banorë, të cilët pohuan para kamerave se në fund të vitit 2020 ka filluar një investim për Ujësjellësin e fshatit Lin. Sipas tyre, zyrtarët e Bashkisë së Pogradecit, u premtuan se do të kishin 24 orë në ditë ujë të pijshëm, ashtu si shumica e banorëve të qytetit apo të fshatrave të këtij qyteti. "Kemi vetëm 1 orë në ditë ujë të pijshëm. Jo 24 orë në ditë, por ne kemi vetëm 24 orë ujë të pijshëm në muaj" thotë një nga banorët. Një tjetër pohon se "uji vjen me pikatore, 1 orë paradite dhe me ditë të rralla pasdite". Banorët tregojnë se investimet janë bërë kohët e fundit, por firma fituese i ka lënë punimet në mes. Ata thonë se projekti ka ndryshuar disa herë dhe deri më tani nuk është bërë asnjë përpjekje për të përmirësuar situatën.