Inspektorati Shtetëror i Mbikëqyrjes së Tregut ka reaguar lidhur me ngjarjen e rëndë të ndodhur në një lokal në Sarandë, kur për pasojë humbi jetën një17 vjeçar. Me anë të një postimi në rrjete sociale ISHMT-së njofton se pajisja që përdorte lokali për transportimin e mallrave nuk ishte ashensor, ndaj nuk kanë kryer inspektime. “Në lidhje me aksidentin e ndodhur mbrëmjen e djeshme datë 26.08.2023 në subjektin “Orange”, Sarandë, ku një i ri 17-vjeçar humbi jetën, Inspektorati Shtetëror i Mbikqyrjes së Tregut pasi ka kryer verifikimet në terren, informon se: Pajisja e përshtatur për transport mallrash nga subjekti, e cila ka pësuar defekt nuk është ashensor. Si rrjedhojë, ISHMT nuk ka kryer inspektime apo kontrolle pranë këtij subjekti, bazuar kjo në detyrimin e përputhshmërisë së instalimit të vendosur në shërbim nga personi përgjegjës, pasi nuk është brenda kompetencës ligjore të tij. ISHMT shpreh keqardhje për aksidentin tragjik dhe i shpreh ngushëllime të sinqerta familjes së të riut.”- shkruhet në Postimin e Inspektoriatit Shtetëror të Mbikqyrjes së Tregut.