Pas tërmetit të fuqishëm të shtatorit, që shkaktoi dëme ndër të tjera tek godina e Bashkisë së Vorës, ky institucion po përjeton lëkundje të tjera të forta, por këtë herë politike. Komisioni Qendror i Zgjedhjeve vendosi t’i heqë mandatin kryetarit të bashkisë zotit Agim Kajmaku. Ai akuzohet, se ka shkelur ligjin e dekriminalizimit, duke mos deklaruar ndalimin dhe hetimin nga organet e drejtësisë së shtetit grek. “Njësoj jemi ne si me kryetar, si pa kryetar. Mirë ja bënë kriminelit. Ne do të votojmë Fiqiriun”, thotë një zonjë. “Ai na i ka zgjidhur hallet. Vetë e ka fajin që nuk e tregoi që në fillim të vertetën”, thotë një zotëri. “Unë e njoh është djalë i mirë”, thotë një tjetër. Agim Kajmaku ishte person nën hetim në 2003 në Greqi, pasi dyshohej, se kishte blerë fidanë dhe bimë të tjera me para të falsifikuara. Gjykata e Selanikut e shpalli atë të pafajshëm, por pavarësisht kësaj, Kajmakun e penalizoi ligji shqiptar i dekriminalizimit. Në Bashkinë e Vorës puna vazhdon normalisht. Në sportele ju shërbehet qytetareve, si çdo ditë, deri në orën 16. Vendimi i KQZ-së i hapi rrugën mbajtjes së zgjedhjeve të reja në këtë qytet.