Mbi 24 orë pas shpërthimit të zjarrit që përfshiu zonën nga fshati Vërnik deri në Kapshticë, situata mbetet ende shqetësuese, ndonëse intensiteti i flakëve është ulur. Rreth 250 hektarë me bimësi të ulët dhe shkurre janë djegur, ndërsa përpjekjet për izolimin e zjarrit po vazhdojnë pa ndërprerje nga mbi 50 forca zjarrfikëse të Bashkisë Devoll, policia kufitare, shërbimi pyjor dhe banorët e zonës. Falë ndërhyrjes së koordinuar, janë shmangur dëmet në jetë dhe janë shpëtuar dhjetëra krerë bagëti dhe një fermë bletësh në rrezik në fshatin Vërnik. Në mëngjesin e së hënës kanë mbërritur forca zjarrfikëse nga Greqia, të cilat u kërkuan nga autoritetet shqiptare për të forcuar përpjekjet drejt izolimit të flakëve përgjatë kufirit. Ndërkohë në jug të vendit vijon zjarri në malin e Dukatit në Vlorë. Terreni i thyer e bën të vështirë ndërhyrjen nga toka, megjithatë 17 forca zjarrfikëse, 30 efektivë të Forcave të Armatosura dhe punonjës të Emergjencave Civile dhe të pyjores janë angazhuar në përpjekjet për të parandaluar përhapjen e flakëve drejt Parkut Kombëtar të Llogarasë.