Zjarret në jug të vendit vazhdojnë të jenë një shqetësim serioz, pavarësisht vënies nën kontroll të disa prej vatrave që rrezikonin zonat e banuara. Aktualisht, dy vatra aktive janë raportuar në afërsi të fshatit Markat, në bashkinë Konispol, konkretisht në zonat e njohura si Pllakoti dhe Kokotraf. Sipas raportimeve nga terreni flakët kanë përfshirë sipërfaqe me pemë frutore dhe ullinj, ndërsa forcat zjarrfikëse të Konispolit dhe banorët lokalë po punojnë me mjete rrethanore për shuarjen e zjarrit, për shkak të mungesës së aksesit për automjete të rënda në terrenin e vështirë. Një tjetër vatër aktive është regjistruar në zonën malore mbi tunelin e Qafës së Skërficës, në rrugën nacionale Kardhiq-Delvinë. Zjarri po përhapet në një terren të thepisur, larg zonave të banuara, me fshatin Fushbardhë që aktualisht nuk është në rrezik. Për shkak të kushteve të vështira për ndërhyrje nga toka, është angazhuar ndërhyrja nga ajri për të frenuar përhapjen e flakëve drejt pyjeve me panjë dhe dushk në zonën e mbrojtur të Zhulatit.