Rezulton i zhdukur prej pesë ditësh, biznesmeni shqiptar në Greqi babai i tre fëmijëve. Kanë qenë familjarët e 46-vjeçarit Xhani Topalli ata që kanë bërë denoncimin në Polici në rajonin e Rodosit. Topalli cilësohet si një kontraktor i njohur në fushën e ndërtimit dhe zhdukja e tij po kthehet në një thriller të vërtetë. Sipas medias greke “Dimokratiki tis Rhodes”, punonjësit e policisë që po kryejnë një hetim të plotë, gjetën makinën e tij Honda CRV 4×4 me xhamat e hapur dhe pa çelësa në Kalythies, në një pikë mermerësh në zonë. Një dëshmitar ka parë makinën në vendngjarje që prej mëngjesit të së hënës, ndërsa nga hetimet në kompaninë e celularëve u zbulua se celulari i tij ka pushuar së funksionuari mbrëmjen e së dielës. Ndërkohë ka një deklaratë nga një ushtar që thotë se Topalli ka qëndruar në zonë në të njëjtën ditë dhe orë.