Mali Fuji i Japonisë ekziston prej thuajse 700 mijë vjetësh, por një mëngjes të nxehtë maji, ai papritur, u zhduk. Të paktën nga njëra anë e një rruge që frekuentohet shumë nga turistët, pamja e simbolit 3776 metra të lartë të japonisë dhe bashkëjetesës së tij me një dyqan, nuk mund të shihej më pasi zyrtarët përfunduan ndërtimin e një barriere 2.5 metra të lartë për të penguar bërjen e fotove virale nga ky vend. Për vendasit, numri i madh i vizitorëve dhe refuzimi i tyre për t'iu bindur rregullave për hedhjen e mbeturinave dhe parkimin ishte bërë një shqetësim dhe rrezik trafiku. "Jam vërtet i lumtur që të huajt po vijnë në qytetin tonë," tha Kikue Katsumata, 73 vjeç. "Por kur bëhet fjalë për të bërë fotografi nga Laëson, rruga është pak e ngushtë dhe mund të jetë e rrezikshme kur njerëzit kalojnë në këmbë pa përfillur sinjalistikën". Marsi dhe prilli vendosën rekorde të të gjitha kohërave për sa i takon numrit të vizitorëve, të nxitur nga kërkesa e ndrydhur pas pandemisë dhe pasi rënia e jenit në nivelin më të ulët në 34 vite e bëri Japoninë një destinacion të leverdisshëm dhe të parezistueshëm. Ky ishte një lajm i mirë për ekonominë, me vizitorët që shpenzuan një rekord prej 1.75 trilionësh jen ose 11.2 miliardë dollarë, në tre muajt e parë të 2024. Vendimi drastik për të bllokuar pamjen e malit Fuji simbolizon tensionet në të gjithë vendin ndërsa Japonia bën llogaritë e pasojave të bumit të saj turistik. Metropoli perëndimor i Osakës dhe qyteti turistik i burimeve të nxehta Hakone, janë ndër vendet që po shqyrtojnë vendosjen e taksave të reja të turizmit për t'i bërë ballë fluksit të vizitorëve.