Tajlanda ka kryer sulme ajrore mbi Kamboxhiaa të hënën, tha ushtria e vendit, ndërsa të dyja palët kanë këmbyer akuza për shpërthimin e fundit të luftimeve në kufirin e kontestuar që la të vrarë një ushtar tajlandez. Pasi trupat e Kamboxhias hapën zjarr mbi forcat tajlandeze të hënën në mëngjes, “ushtria mori raportime se ushtarë tajlandezë u sulmuan me armë zjarri, cka rezultoi në një ushtar të vrarë dhe katër të plagosur”, tha zëdhënësi i ushtrisë tajlandeze. Ai shtoi se Tajlanda ka “përdorur avionët luftarakë për të goditur shënjestra ushtarake në disa zona”. Zëdhënësja e Ministrisë së Mbrojtjes të Kamboxhias, tha në anën tjetër se forcat tajlandeze nisën një sulm ndaj forcave mëngjesin e së hënës, duke akuzuar Tajlandën se ka hapur zjarr me tanke mbi një tempull dhe në zona afër tij. Ajo tha se Kamboxhia nuk iu kundërpërgjigj këtyre sulmeve. Të dyja palët raportuan për përleshje edhe të dielën, teksa ushtria e Tajlandës raportoi për dy ushtarë të plagosur. Gjatë kësaj vere, përleshjet pesëditore mes Tajlandës dhe Kamboxhias lanë të vrarë 43 persona dhe zhvendosën rreth 300 mijë të tjerë, para se të hynte në fuqi një armëpushim. Ndërprerja e luftimeve u ndërmjetësua pjesërisht nga Shtetet e Bashkuara, Kina dhe Malajzia. Në tetor, presidenti amerikan, Donald Trump, nënshkroi një deklaratë të përbashkët mes Tajlandës dhe Kamboxhias, duke promovuar marrëveshje të reja tregtare me këto dy vende pasi ato u pajtuan që të zgjasnin armëpushimin. Por, Tajlanda e pezulloi marrëveshjen muajin e kaluar, pas shpërthimit të dyshuar të një mine toke që la të plagosur disa ushtarë.