Një përmbytje në muzeun e Luvrit në Paris ka dëmtuar qindra vepra, vetëm disa javë pasi hajdutët vodhën xhevahire të çmuara të kurorës franceze nga muzeu, në mes të ditës. Zëvendësadministratori i muzeut, Francis Steinbock, tha se 300 deri në 400 vepra, kryesisht libra, u prekën nga rrjedhja e ujit, dhe se numërimi ishte duke vazhduar. Steinbock u tha mediave franceze se ngjarja ndodhi në departamentin egjiptian dhe se vëllimet janë "ato të konsultuara nga egjiptologët", por se "asnjë libër i çmuar" nuk u prek. Problemi që shkaktoi rrjedhjen, i cili u zbulua në fund të nëntorit, ishte i njohur prej vitesh, dhe riparimet janë planifikuar për vitin e ardhshëm, shtoi Steinbock. Vëllimet do të thahen, do të dërgohen në një libralidhës dhe do të restaurohen para se të kthehen në rafte. Steinbock i përshkroi librat si "revista egjiptologjike" dhe "dokumentacion shkencor" nga fundi i shekullit të 19-të dhe fillimi i shekullit të 20-të. "Asnjë objekt i trashëgimisë nuk është prekur nga ky dëmtim," tha Steinbock për agjencinë e lajmeve AFP.