Fushata 30 ditore u përmbyll dhe tashmë vendi ndodhet në heshtje zgjedhore, periudhë e konceptuar nga ligjvënësit si koha për reflektim për qytetarët para se të votojnë të dielën. Mesazhet politike janë të ndaluara, përveç atyre që lidhen me thirrjet për pjesëmarrje, për një proces zgjedhor të qetë dhe pa incidente në të 61 bashkitë. Edhe kjo fushatë u karakterizua nga një retorikë e ashpër mes udhëheqësve politikë, që la sërish në plan të dytë programet e kandidatëve për kryetarë bashkie. Sa u takon incidenteve, u raportuan disa ngjarje në Has, Kukës, Berat, Patos, ndërsa në Himarë njëri prej kandidatëve përfundoi në prangat e policisë, që siç thotë në njoftim u kap në flagrancë duke blerë vota.