Prezenca e Bashkimit Evropian në Tiranë ka dalë me një deklaratë publike për sa u përket zgjedhjeve të 25 prillit në vendin tonë. Ambasadori i BE në Tiranë Luigi Soreca dhe ambasadorët e tjerë të BE, kanë një thirrje të përbashkët lidhur me zgjedhjet duke thënë se fushatat duhet të zhvillohet në mënyrë paqësore dhe pa gjuhën e urrejtjes. Më tej Ambasadorët, kujtojnë rëndësinë e dialogut politik konstruktiv dhe gjithëpërfshirës. Ata kanë bërë thirrje që partitë dhe kandidatët të përqendrojnë debatet në programet përkatëse. Zgjedhjet transparente, gjithëpërfshirëse, të lira dhe të ndershme, si dhe respektimi i rezultatit të tyre, janë të rëndësishme për të siguruar legjitimitetin e Asamblesë dhe qeverisë së re, thuhet në letrën e ambasadorëve të be. ne kemi besim, cijohet më tej, se të gjitha institucionet përkatëse shqiptare dhe aktorët politikë do të veprojnë në përputhje me standardet ndërkombëtare dhe me vendimet e Komisionit Qendror të Zgjedhjeve. Duke inkurajuar qytetarët e Shqipërisë të ushtrojnë të drejtën e tyre për të votuar, në respektim të të gjitha masave kundër pandemisë COVID-19, Prezenca e Bashkimit Evropian në Tiranë ka garantuar mbështetjen për përpjekjet e organizatave shqiptare të shoqërisë civile, për të vëzhguar fushatën zgjedhore dhe procesin e ditës së zgjedhjeve. Komuniteti ndërkombëtar po e mbështet dhe po e monitoron në mënyrë aktive të gjithë procesin e përgatitjes dhe kryerjes së zgjedhjeve, para së gjithash përmes misionit të ODIHR-it. Po ashtu, Delegacioni i BE-së dhe ambasadat e Shteteve Anëtare të BE-së do të vizitojnë një numër të madh vendvotimesh ditën e zgjedhjeve, thuhet në letrën e ambasadorëve të BE në vendin tonë