Zbardhet ngjarja e ndodhur mbrëmjen e së hënës, në lagjen nr. 4 të Durrësit ku mbeti i plagosur një shtetas. Policia njofton se në përfundim të veprimeve të para hetimore u arrestua në ambientet e spitalit, shtetasi Arbër Tivari. 25 vjeçari rezulton të jetë i dënuar më parë për veprën penale "Prodhimi dhe shitja e narkotikëve". Ndërkaq nga njoftimi i policisë mësohet si është shpallur në kërkim shtetasi Alket Buçpapaj, 28 vjeç, edhe ky I dënuar më parë për veprën penale "Armëmbajtja pa leje". Nga veprimet hetimore ka rezultuar se më datë 22 mars, rreth orës 19:20, në lagjen nr. 4, Durrës, pas një konflikti fizik të çastit dhe më pas me përdorimin e armëve të zjarrit, Buçpapaj ka plagosur me armë zjarri në krah, shtetasin Arbër Tivari, i cili ndodhet nën kujdesin e mjekëve, jashtë rrezikut për jetën. Gjatë kontrollit të ushtruar në banesën e Tivarit, shërbimet e Policisë kanë gjetur 1 armë zjarri automatik, 1 armë të ftohtë (thikë), një kapuç në ngjyrë të zezë dhe municion luftarak, të cilat u sekuestruan në cilësinë e provës materiale. Nën drejtimin e Prokurorisë së Rrethit Gjyqësor Durrës, vijon puna për zbardhjen e plotë të rrethanave të ngjarjes dhe për kapjen e shtetasit Alket Buçpapaj. Materialet i kaluan Prokurorisë së Rrethit Gjyqësor Durrës, për veprat penale "Vrasja me dashje” mbetur në tentativë" dhe "Armëmbajtja pa leje" në ngarkim të shtetasit Alket Buçpapaj si dhe për veprat penale "Mbajtja pa leje e armëve në banesë" dhe "Mbajtja pa leje e armëve të ftohta", në ngarkim të shtetasit Arbër Tivari.