Policia e Shkodrës ka arrestuar tre persona pasi dyshohet se fshihen pas dy plagosjeve që u regjistruan një ditë më parë. Në lagjen “Tre Heronjtë”, gjatë një konflikti për motive të dobëta, dy vëllezër Bledar dhe Bujar Bylykbashi dyshohet se kanë goditur me sende të forta dhe me mjet prerës Brigel Bizin. Ky i fundit ndodhet në spital dhe po merr mjekim, si dhe është jashtë rrezikut për jetën. Ndërkohë, në fshatin Nderlysaj në Theth, Franc Thacina, akuzohet për plagosje të rëndë me dashje dhe mbajtje pa leje të armëve të ftohta, pasi gjatë një konflikti për motive të dobëta ka goditur me thikë një 28 vjeçar. Edhe ky i fundit është jashtë rrezikut për jetën dhe po trajtohet në spital. Mjeti prerëse janë sekuestruar si provë materiale. Të tre akuzohen veprat penale “Plagosja e rëndë me dashje” dhe “Mbajtja pa leje e armëve të ftohta”.