Miliona njerëz në meksikë janë paralajmëruar të nisin përgatitjet për evakuim të mundshëm pas rritjes së aktivitetit të vullkanit aktiv më të rrezikshëm në vend, që ka lëshuar hi në qiell dhe mbi qytetet përreth që prej javës së shkuar. Hiri nga vullkani Popokatepetl, që ndodhet në pjesën qendrore të vendit, ka bërë që të vonohen fluturimet në qytetin e meksikës dhe ka detyruar autoritetet të mbyllin shkollat në dhjetra bashki. Rreth 25 milionë njerëz jetojnë në një rreze prej 100 kilometrash rreth vullkanit që ndodhet 70 km në juglindje të qytetit të meksikos, mes shteteve morelos, puebla dhe shtetit të meksikos. Të dielën, qendra kombëtare e mbrojtjes civile rriti nivelin e kërcënimit në të verdhë, dhe kjo vendos nën paralajmërim 3 milionë persona që jetojnë në qytetet dhe fshatrat pranë vullkanit duke u kërkuar të qëndrojnë vigjilentë dhe të përgatiten për evakuim të mundshëm. Po ashtu ekspertët paralajmëruan për aktivitet më të madh vullkanik dhe përhapje të hirit në qytetet përreth, madje me shpejtësi të madhe. Aeroporti ndërkombëtar Benito Huarez, në qytetin e meksikos u mbyll përkohësisht të shtunën me fluturimet që vazhdojnë të vonohen edhe në ditët në vijim. Ambasada amerikane në meksikë ka lëshuar një paralajmërim për shtetasit e vet, që të tregojnë kujdes dhe të mos udhëtojnë në zonat pranë tij. Vullkani, ka qendruar i fjetur për dekada të tëra deri sa shpërtheu në 1994-ën. Që atëherë, dridhjet e tij janë bërë pjesë e jetës së përditshme të banorëve.