Katër çështje mbeten vendimtare për fatin e armëpushimit mes SHBA-së dhe Iranit: situata në Liban, rihapja e Ngushticës së Hormuzit, siguria e trafikut detar dhe programi bërthamor iranian. Pikërisht mbi këto pika do të përqendrohen negociatat mes delegacioneve që nisin të shtunën në Islamabad. Armëpushimi mbetet në pikëpyetje serioze, sidomos pas sulmeve izraelite në Bejrut, të cilat sipas Teheranit cenojnë bazën e draft-marrëveshjes së ndërmjetësuar nga Pakistani. Kjo ka shtuar tensionet dhe ka vështirësuar gjetjen e një kompromisi të shpejtë. Ngushtica e Hormuzit vijon të jetë nyja më delikate, pasi bllokimi i saj ka tronditur tregjet globale të energjisë dhe ka lënë qindra anije të bllokuara në Gjirin Persik. Problem mbetet edhe synimi i shpallur tashmë i Teheranit për të taksuar me një dollar çdo fuçi nafte, duke pretenduar që ajo të paguhet edhe në kriptovalutë.