Prokuroria e Fierit ka dërguar për gjykim dy autorët e dyshuar Florian Muka dhe minorenin Klajdi Muka, kushërinj më njeri -tjetrin, të cilët pas një konflikti të nisur në rrjetet sociale vranë shtetasin Grei Bihuci, ngjarje e ndodhur më shumë se një vit më parë. Dy autorët e vrasjes, Florian dhe Klajdi Muka, akuzohen për veprat penale ‘Vrasja me paramendim’, e kryer në bashkëpunim dhe ‘Prodhimi, mbajtja, blerja apo shitja pa leje e armëve të ftohta’. Prokuroria njofton se sipas hetimeve, rezultoi se më 11 mars 2024, rreth orës 11:30, në lagjen “Kongresi i Përmetit” të qytetit të Fierit, gjatë një takimi për t’u sqaruar lidhur me një konflikt të ndodhur ditë më parë dhe të publikuar në rrjetet sociale, Florian dhe Klajdi Muka, të cilët kanë pasur me vete armë të ftohta, në bashkëpunim me njëri-tjetrin kanë goditur viktimën Grei Bihuci, duke i shkaktuar atij vdekjen e menjëhershme.