Sofokli Shani, 62 vjeçari, i cili për një gotë birrë, i mori jetën Hirakli Qorrit, mesnatën e 2 qershorit, ëshë lënë në burg nga Gjykata e Lushnjës. Seanca për masën e sigurisë u zhvillua 2 ditë pas vrasjes, në Gjykatën e Shkallës së parë të Lushnjës. Në dyert e gjykatës, Shani ka mbërritur rreth orës 9.30, i veshur me një palë pantallona ushtarake dhe me një bluzë në kokë për të fshehur fytyrën. Përballë trupës gjykuese, Sofokli Shani ka shfaqur pendesë duke nënvizuar se ka qenë efekti i alkoolit ai që e shtyu të ndërmerrte aktin pa kthim pas. Shani ka nënvizuar se nuk ka pasur asnjë problem të mëparshmë me dy pjesëtarët e familjes Qorri, dhe se gjithë konflikti ka qenë momental nën gjendjen e alkoolit. Përsa i përket armës së zjarrit, me të cilën shënoi aktin fatal, Shani pohoi se e kishte ruajtur që pas trazirave të vitit 1997. Mësohet se Sofokli Shani ka pranuar akuzën për krimin e kryer, si dhe ka kërkuar gjykimin e shkurtuar nga trupa gjykuese.