Me një tender pa garë, kompania Smartmatic pasi ka fituar projektin për identifikimin biometrik të zgjedhësve ka fituar edhe projektin per votimin e numërimin elektronik. Në këtë mënyrë kompania Smartmatic ka mundur të sigurojë kontratën e dytë me vlerë rreth 1 milion dollarë per votimin dhe numërimin elektronik në zgjedhjet e 25 Prillit. Në Agjencinë e Prokurimeve Publike eshte botuar buletini i posaçëm ku kompania Smartmatic konsiderohet si oferta më e leverdisshme. Afati i kontratës është dy muaj per projektin pilot që parashikohet të implementohet në 32 qendrat e votimit te njesisë administrative numër 10 në Tiranë. Në janar kompania SmartMatic arriti te fitojë si kompania e vetme në garë, me tender pa shpallje dhe me negocim të drejtëpërdrejtë me KQZ-në edhe projektin për identifikimin e zgjedhësve, për të cilin kërkoi rreth 16 milionë euro. Kjo është hera e parë që në një proces zgjedhor në Shqipëri do të aplikohet teknologjia në zgjedhje, për identifikimin biometrik të votuesve dhe më pas për numërimin e elektronik, si një mënyrë për të shmangur votimet familjare, dhe votimin më shumë se një herë të një personi.