Presidentja e Kosovës, Vjosa Osmani dhe kryeministri Albin Kurti, emëruan si drejtorin e ri të përgjithshëm të agjensisë së Zbulimit në kosovë, Petrit Ajetin. Njoftimi erdhi nga zyra e presdidentes Osmani, ku mes të tjerash thuhet se Ajeti është i specializuar në disa programe ndërkombëtare në kuadër të zhvillimit profesional në fushën e Sigurisë dhe ka një përvojë pune 15 vjeçare në institucionet publike dhe private në fushën e sigurisë. Ai renditet i gjashti në rradhë si shef i Agjencisë së Zbulimit të Kosovës dhe pason në këtë post ish shefin e kësaj agjencie, Kreshnik Gashi, i cili në dhjetor të vitit të kaluar u shkarkua nga detyra. Në atë kohë vendimi erdhi pas pretendimeve se një inspektor i agjencisë kishte provuar të marrë disa dokumente nga kasaforta e presidencës më 6 nëntor 2020, një ditë pas dorëheqjes së ish presidentit Hashim Thaçi, cili ndodhet në Hagë për t'u përballur me akuzat për krime luftë dhe krime kundër njerëzimit. Përpjekja, sipas zyrtarëve të presidencës, thuhet të jetë bërë në praninë e tashmë ish sekretarit të zyrës së presidentit, Driton Gashi, i cili më herët kishte shërbyer si drejtor i Agjencisë së Zbulimit. Agjencia e Zbulimit u themelua pas pavarësisë së Kosovës, e cila u shpall në shkurt të vitit 2008. Tre prej shefave të saj dhanë dorëheqje ndërsa dy u shkarkuan duke bërë që asnjëri të mos përmbushë mandatin deri në fund.