Biznesmeni Helidon Gjikoka, i cili akuzohet për tjetërsimin e pronave në bregdetin e Dhërmiut, është liruar nga qelia e burgut. Kjo pas një vendimi të gjykatës, e cila nga arrest në burg, vendosi për të masën e sigurisë arrest në shtëpi. Vendimi u mor në datën 24 mars, nga gjyqatri i cështjes Engert Pëllumbi, pasi Gjikoka përpara trupës gjykuese, u shpreh se po përjetonte një presion të paparë në izolim dhe se në asnjë moment ai nuk i është fshehur drejtësisë, por gjithmonë është përballur me ngritjen e akuzave. Në seancën gjyqësore, avokati i Gjikokës dhe vetë ai, pretenduan se ai ishte dorëzuar vetë në komisariatin e Vlorës, menjëherë pasi mori lajmin se ishte shpallur në kërkim, duke shtuar se nuk është arrestuar nga policia. Por nuk ka qenë e të njëjtin mendim prokurorja e çështjes, Elida Hoxha, e cila e vuri theksin në një dokument të nxjerrë nga sistemi TIMS, ku sipas saj personi i pandehur Helidon Gjikoka është arrestuar nga policia dhe jo vetëdorëzuar, siç ai pretendon. Pasi trupa gjykuese ka gjykuar të gjitha prentendimet, mori vendimin që Gjikokës ti zbutej masa e sigurisë nga arrest në burg në arrest shtëpiak. Ky i fundit është marrë i pandehur nga prokuroria e Vlorës për akuzën e “falsifikimit të dokumenteve”, duke arritur të tjetërsojë një sipërfaqe toke prej 1430 metra katror në bregdetin e Dhërmiut.