Gjykata Administrative i ka dhënë të drejtë Bashkisë së Tiranës për prishjen e pallateve të dëmtuara nga tërmeti në zonën e Kombinatit, duke i hapur kështu rrugë projektit për ndërtimet e reja. Trupa gjykuese ka vlerësuar si të drejta ekspertizat e kryera mbi pallatet e dëmtuara në Rr. "Llazi Miho" në Njësisë Administrative Nr. 6, si dhe vendimet e marra nga ana e Këshillit Bashkiak pas zhvillimit edhe të dëgjesave. “Gjykata çmon se vendimi i Këshillit Bashkiak nr. 111, datë 28.09.2020 është nxjerrë në përputhje me ligjin, ai nuk është një akt absolutisht i pavlefshëm dhe nuk mund të konstatohet si i tillë. Kërkesë padia për këtë pjesë është e pabazuar dhe duhet rrëzuar.” thuhet në vendimin e zbardhur të Gjykatës. Duke qenë se kërkesë padia rezultoi e pabazuar shpenzimet gjyqësore i janë ngarkuar palës paditëse.