Shqipëria edhe këtë vit është në kategorinë e regjimeve hibride/demokraci në tranzicion, në raportin e përvitshëm “Vendet në Tranzicion 2021” të Freedom House. Vendi shënoi rënie krahasuar me një vit më parë në shoqërinë civile dhe median e pavarur. Në një shkallë vlerësimi nga 1 deri në 7 pikë, ku 1 është niveli më i ulët i demokracisë është 7 më i larti, Shqipëria nga 3.82 pikë që kishte një vit më herët, këtë radhë kishte 3.75 pikë. “Ajo që vërehet është që nota e përgjithshme e Shqipërisë, është në nivelin e notës që Shqipëria ka marrë në vitin 2013. Pra demokracia në Shqipëri është në të njëjtat nivele që Shqipëria ka pasur në vitin 2013, sipas së njëjtit raport të Freedom House. Vlerësimi për shoqërinë civile ra nga 5 në 4.75 pikë. Vlerësimi për gjendjen e pavarësisë së medias ndërkohë ra nga 3.75 në 3.50. Përveç rënies në kategoritë e qeverisjes demokratike dhe procesit zgjedhor, dy treguesit me vlerësimin më të ulët janë korrupsioni dhe pavarësia e gjyqësorit: respektivisht 3.25 dhe 2.75, i njëjti nivel si një vit më parë. Raporti vë në dukje situatën e acaruar politike, korrupsionin dhe presionin e bizneseve ndaj qeverisë si probleme të vazhdueshme. Por aty vlerësohen edhe hapat drejt reformës në drejtësi, megjithëse thuhet se ishin të ngadalta. Publikimi i raportit të këtij viti përkon me një kohë kur është bërë e qartë që Partia Socialiste në Shqipëri do të qeverisë edhe për një mandat tjetër por vlerësimi për ecurinë e zgjedhjeve do të analizohet në raportet e ardhshme të Freedom House. Edhe Kosova, e cila po ahstu ndodhet në grupin e regjimeve hibride/demokraci tranzicionale ka shënuar rënie ndërsa maqedonia e veriut është në raport një nga vendet me përparimin më të madh demokratik në vitin 2020. Në rrafshin e përgjithshëm, Freedom House thotë se udheqësit e zgjedhur në Evropën Qendrore dhe Lindore po minojnë vetë institucionet që i sollën ata në detyrë, duke refuzuar normat demokratike dhe duke promovuar sisteme alternative të qeverisjes autoritare. Sipas raportit lloji më i zakonshëm i regjimit në Ballkan vazhdon të jetë ai hibrid/demokraci në tranzicion.