Gazetari investigativ në Holandë, Peter R de Vries, i cili u qëllua dhe u plagos rëndë në qendër të Amsterdamit, nëntë ditë më parë, ka vdekur, njoftuan të enjten të afërmit e tij. Në një deklaratë të lëshuar për mediat thuhet se “Peter luftoi deri në fund, por nuk arriti të fitojë betejën”. De Vries, 64 vjeç, u qëllua në kokë disa minuta pasi doli nga një studio televizive. Ai u qëllua me disa plumba ndërsa po ecte drejt makinës së tij, në Amsterdam. Në të kaluarën, gazetarit i ishte dhënë mbrojtje nga policia, pasi kishte marrë kërcënime, për shkak të përfshirjes në çështje penale si gazetar hulumtues. De Vries kishte punuar për krime të profilit të lartë e madje edhe kishte ndihmuar në zbardhjen e shumë rasteve. Ndërkohë, atentati ndaj tij ndodhi në mesin e një gjykimi të një bosi të dyshuar të Mafias, Ridouan Taghi. Komisionerja e Këshillit të Evropës për të Drejtat e Njeriut, Dunja Mijatoviq, tha se vdekja e gazetarit është një “lajm i tmerrshëm dhe shkatërrues”. “Peter ka jetuar me bindjen: ‘Me një gju të përkulur nuk ka asnjë mënyrë të jesh i lirë’. Ngushëllime familjes dhe gjithë gazetarëve!”, shkroi Mijatoviq në Tëitter. Policia në Holandë ka thënë më herët se sulmuesi i dyshuar është një shtetas holandez, 21 vjeç.