Policia e Durrësit arrestoi operatorin turistik Luis Xhumari, pas ngjarjes tragjike në det ku humbi jetën një pushues anglez 34-vjeç, teksa drejtonte një Jet Ski pa leje përkatëse. Prangosja u bë për akuzën “Shkelje e rregullave të mbrojtjes në punë”, pasi u konstatua se mjeti lundrues i ishte dhënë me qira viktimës në kundërshtim me rregulloren. Sipas hetimeve, turisti nuk kishte patente për përdorimin e një Jet Ski, ndërkohë që ligji parashikon qartë se mjetet e tilla mund të jepen me qira vetëm kur personi posedon leje për drejtimi. Në të kundërt, drejtimi duhet të bëhet nga një punonjës i trajnuar i subjektit turistik. Ngjarja ndodhi në zonën e Shkëmbit të Kavajës, ndërsa pritet rezultati i ekspertizës mjeko-ligjore për të përcaktuar shkakun e saktë të vdekjes së turistit me pasaportë britanike, nëse ka ardhur nga mbytja apo si pasojë e një ataku kardiak.