Organizata Botërore e Shëndetësisë tha se varianti B.1617 i koronavirusit, i identifikuar për herë të parë në Indi vitin e kaluar, është klasifikuar si “variant i shqetësimit global”. “Ka disa informacione në dispozicion, që sugjerojnë rritjen e transmetimit të tij. Prandaj, ne do ta klasifikojmë këtë si variant të shqetësimit global”,”, tha Maria Van Kerkhove, epidemiologe në OBSH. India, e cila po përjeton një nga shpërthimet më të këqija në botë të koronavirusit, raporton prej ditësh afërsisht 400 mijë të prekur nga covid dhe mijëra viktima. Vala shkatërruese atje ka mbingarkuar sistemin e kujdesit shëndetësor, ndërsa ekspertët thonë se shifrat zyrtare për rastet dhe viktimat janë shumë më të ulëta sesa shifrat reale.Tashmë për sa kohë ka pasur shqetësime se variant indian mund të jetë duke kontribuar në përhapjen alarmante të koronavirusit. Më herët OBSH, ka klasifikuar si variante shqetësuese, edhe variantin britanik, brazilian dhe atë të Afrikës së Jugut. Ato shihen si më të rrezikshme se versioni origjinal i virusit duke qenë se janë më të transmetueshme. Van Kerkhove tha se OBSH-ja do të dalë me më shumë informacione rreth variantit indian të martën, në raportimin e saj javor.