Vajza e sundimtarit të Dubait, që u përpoq të arratisej nga vendi në 2018, më pas i dërgoi një video mesazh sekret miqve të saj, duke akuzuar të atin se po e mban peng dhe se ajo ka frikë edhe për jetën. Në pamjet e siguruara nga BBC Panorama, Princesha Latifa al Maktoum, thotë se komandot e kishin droguar atë ndërsa ajo u përpoq të largohej me anije dhe e kishin kthyer pas atë në burg. Mesazhet e saj sekrete janë ndalur tani dhe miqtë, i kërkojnë Kombeve të Bashkuara të ndërhyjnë. Dubai dhe Emiratet e Bashkuara Arabe kanë thënë më herët se ajo është e sigurt, në kujdesin e familjes së saj. Një ish e dërguar e kombeve të bashkuara, Mary Robinson, që e kishte cilësuar Latifën si një të re me probleme, pasi e kishte takuar në 2018, thotë tani se ajo ishte keqinformuar në mënyrë të tmerrshme nga familja e princeshës. Ish komisionerja e lartë e kombeve të bashkuara për të drejtat e njeriut dhe presidente e irlandës, i është bashkuar tani thirrjeve për ndërhyrje ndërkombëtare për të përcaktuar gjendjen aktuale të princeshë Latifës dhe vendndodhjen e saj. “Unë vazhdoj të jem e shqetësuar për Latifën. Gjërat kanë ecur përpara dhe unë mendoj se duhet hetuar”, thotë ajo. Babai i Latifës, Sheiku Mohammed Bin Rashid al Maktoum, është një nga shefat e shteteve më të pasur në botë, sundimtar i dubait dhe zëvendëspresident i Emirateve të Bashkuara Arabe. Videot ishin regjistruar gjatë disa muajve, në një telefon që Latifa e kishte siguruar fshehtazi, rreth një vit pas kapjes së saj dhe kthimit në Dubai. Ajo i regjistroi ato në një tualet pasi ai kishte të vetmen derë që ajo mund ta mbyllte. Rrëfimet e saj iu dërguan BBC nga një mike e ngushtë e saj, një kushëri nga ana e të ëmës dhe një aktivist, që qëndrojnë pas një fushate që kërkon lirimin e saj. Ata thonë se e kanë marrë vendimin e vështirë për publikimin e videove, për shkak të shqetësimit për sigurinë e saj. Sipas tyre, ajo mbahej në një vilë në dubai, ku dritaret ishin me kangjella dhe ruhej nga policë.