Paralajmërimet për përmbytje të menjëhershme ishin në fuqi në Los Angeles dhe pjesën më të madhe të Kalifornisë jugore të mërkurën, pasi një nga stuhitë më të forta të Krishtlindjeve në kujtesë solli shira të rrëmbyeshëm dhe frikë nga rrëshqitjet vdekjeprurëse të dheut. E shtyrë nga një lumë atmosferik i njohur si "Ekspresi i Ananasit", i cili zhvendos lagështinë nga klimat tropikale të Havait në Bregun Perëndimor, stuhia pritet të sjellë shira të barasvlefshëm me sasinë e muajve të tërë në ditët e ardhshme. Guvernatori i Kalifornisë, Gavin Neësom, shpalli gjendje të jashtëzakonshme në disa qarqe, përfshirë Los Angelesin, për të lehtësuar mobilizimin e shpejtë dhe ndarjen e burimeve nëse do të jetë e nevojshme. "Përmbytjet e menjëhershme që kërcënojnë jetën vazhdojnë mbi Kaliforninë Jugore sot dhe nesër; bora e madhe në male dhe erërat e forta gjithashtu vazhdojnë", tha Shërbimi Kombëtar i Motit duke shtuar se "jeta e njerëzve dhe pronat janë në rrezik të madh". Reshjet e para të rrëmbyeshme goditën rajonin të martën në mbrëmje, duke e lënë Los Angelesin me pemë të rrëzuara dhe mbeturina në rrugë, si dhe me përmbytje që penguan trafikun.