Aeroplanmbajtësja USS Harry S. Truman po drejton një grup beteje në një stërvitje ushtarake në Adriatik dhe komandanti i saj nuk pranoi të spekulojë se çfarë do të ndodhë pas përfundimit të stërvitjeve në ditët në vijim, sepse rregullat ndalojnë të flitet për operacionet e ardhshme. Por prania e aeroplanmbajtëses është një simbol i fuqishëm i fuqisë ushtarake të SHBA-së dhe fuqisë së NATO-s në rajon në kontekstin e rritjes së tensioneve mbi ngritjen e forcave ruse pranë kufijve të Ukrainës, shkruan agjencia e lajmeve Hina. “Vendimi se ku do të vendoset grupi luftarak i SHBA-së merret në nivelin e Sekretarit të Mbrojtjes”, tha kundëradmirali amerikan Curt Renshaë, i cili drejton grupin luftarak. “Por ne jemi të gatshëm të veprojmë kudo, kemi planifikuar të jemi në një mision të gjatë kur u larguam nga Norfolku dhe planifikojmë të veprojmë aty ku ketë më shumë nevojë”, shtoi ai. Grupi i betejës nën kontrollin operacional të NATO-s ndodhet në Adriatik për stërvitje të koordinuara detare, trajnime për luftë kundër nëndetëseve dhe trajnime të sulmeve me rreze të gjatë. Duke njoftuar stërvitjen, të quajtur “Neptuni Strike 2022”, NATO tha se ishte hera e parë që nga Lufta e Ftohtë që një grup i tërë luftarak i SHBA-së ishte vendosur nën komandën e saj. Departamenti i Mbrojtjes i SHBA-së thekson rolin e aeroplanmbajtëses së saj në këto stërvitje si provë se NATO është “e bashkuar, e aftë dhe e fortë”.