BE po merr në konsideratë krijimin e një trupe ushtarake prej mbi 5 mijë trupash deri në 2025 për të ndërhyrë në një varg krizash dhe pa u mbështetur tek Shtetet e Bashkuara. Një draft plan, nënvizon se forca e reagimit të shpejtë e BE-së, do të ketë trupa tokësore, detare dhe ajrore që do të mund të dislokohen kudo e kurdo, në varësi të krizave. Ministrat e jashtëm dhe ata të mbrojtjes së BE nisën të debatonin planin mbrëmjen e të hënës në Bruksel dhe vazhduan edhe të martën, me qëllim dakordësimin për një dokument përfundimtar deri në mars të vitit të ardhshëm. Presidenca sllovene e e BE i tha gazetarëve se reagimet janë pozitive por ka një ndarje tradicionale mes shteteve të BE-së të fokusuara tek rusia dhe atyre që shqetësohen për sulme terroriste dhe destabilitet. “Përshtypjet e para janë të mira. Sigurisht ne duhet të koordinohemi”, tha Matej Tonin, ministri slloven i mbrojtjes. Dy dekada pasi liderët e BE ranë dakord për ngritjen e një force me 50-60 mijë pjesëtarë, por dështuan ta bënin atë operacionale, strategjia e re është përpjekja më konkrete për të krijuar një forcë ushtarake të BE-së që nuk varet tek asetet amerikane.