Jared Kushner (Xhared Kashner), dhëndri i presidentit amerikan Donald Trump, ka hequr dorë nga plani për ndërtimin e një hoteli luksoz në Beograd, pas polemikave dhe zhvillimeve të reja hetimore në Serbi. Lajmi është raportuar nga Ëall Street Journal. Projekti ishte parashikuar në truallin e ish-ndërtesës së Shtabit të Përgjithshëm të Ushtrisë së Jugosllavisë, e shkatërruar gjatë bombardimeve të NATO-s në vitin 1999. Kompania e Kushnerit, “Affinity Partners”, kishte planifikuar ndërtimin e një kompleksi luksoz në këtë zonë qendrore të kryeqytetit. Tërheqja vjen në të njëjtën ditë kur Prokuroria për Krimin e Organizuar ngriti aktakuzë ndaj ministrit serb të Kulturës, Nikolla Sellakoviç, për keqpërdorim detyre dhe falsifikim dokumentesh, lidhur me heqjen e statusit të pasurisë kulturore për ish-godinën. “Projektet e mëdha duhet të bashkojnë dhe jo të ndajnë”, deklaroi një zëdhënës i “Affinity Partners”, duke konfirmuar vendimin për t’u tërhequr nga projekti. Ndërkohë, Kushner ka në plan edhe një investim në Shqipëri, ku synon shndërrimin e Ishullit të Sazanit në një resort luksoz. Projekti, me vlerë 1.4 miliardë euro, është miratuar si investim strategjik. Qëllimi i projektit që do ndërtohet është transformimi i ishullit të Sazanit, i përdorur deri më tani vetëm si një baze ushtarake, në një eko-resort luksoz, pjesë e rrjetit të resorteve Aman dhe që jep shërbime hotelerie luksi për më të pasurit në botës. Resortet Aman janë të ngritura në disa shtete të botës që nga Arabia Saudite, Tailanda, Meksika, Italia, Indonesia, India e tani së fundi hartës i shtohet edhe Shqipëria.