Urdhri për të kufizuar një sistem satelitor, të cilin Ukraina e përdor për komunikime në fushën e betejës dhe për operacione me dronë, erdhi nga Shtëpia e Bardhë, sipas dy zyrtarëve amerikanë dhe një zyrtari perëndimor të informuar mbi këtë çështje. Zyrtarët thanë se drejtuesit në Departamentin e Mbrojtjes morën një mesazh se shërbimi "Starshield" i kompanisë SpaceX, i përdorur nga ushtria ukrainase, duhej të ngadalësohej. Zyrtarët, të cilët folën në kushte anonimiteti, nuk specifikuan se kush në Shtëpinë e Bardhë e mori vendimin apo kush ishte përgjegjës për zbatimin e urrdhrit. Pentagoni është klienti më i madh i "Starshield", i cili është versioni për përdorim ushtarak i shërbimit "Starlink". Zyrtarët ukrainas thanë këtë javë se marrësit e "Starlink" të nivelit ushtarak ndalonin së funksionuari në Ukrainë kur vendoseshin në objekte që lëvizin me shpejtësi të lartë. Kjo ndikoi negativisht në performancën e dronëve ukrainas, të cilët mbështeten te këta marrës për sistemet e tyre të drejtimit gjatë fluturimit mbi territorin ukrainas. Një përfaqësues i Ministrisë së Mbrojtjes së Ukrainës tha të enjten se marrësit tani funksionojnë edhe gjatë lëvizjes, por vetëm deri në shpejtësinë 160 km/orë.