Gjykata e Posaçme ka miratuar kërkesën e SPAK, duke vendosur masën e sekuestros për 12 milionë euro pasuri, kryesisht prona të patundshme në pronësi të personave të akuzuar në kuadër të operacionit Ura, që u ndërmor në bashkëpunim me antimafian italiane. Në total janë sekuestruar 21 pasuri të paluajtshme, mes tyre dyqane, troje, ndërtesa, njësi shërbimi, bodrume dhe apartamente, të gjitha të vendosura në qytetin e Durrësit. Pasuritë u përkasin personave nën hetim në kuadër të këtij operacioni, si të dyshuar anëtarë të një grupi të fuqishëm të strukturuar kriminal me aktivitet kryesor trafikun ndërkombëtar të drogës. Sekuestrimi u bë me kërkesë të Prokurorisë së Posaçme dhe u ekzekutua më 27 qershor 2025. Operacioni “Ura” u finalizua në maj 2025 si një goditje e përbashkët e SPAK dhe autoriteteve antimafia italiane, në bashkëpunim me Eurojust dhe Drejtorinë e Antimafias në Bari.