Një burrë mbeti I varur në një urë prej xhami, në verilindje të Kinës, pasi një erë e fortë theu panelet prej xhami rreth tij. Burri ndodhej në urën 100 metra të lartë në qytetin Long-jing, kur ajo u godit nga një stuhi e fuqishme. Një erë me shpejtësi deri 150 km/ore theu disa panele xhami, duke e bllokuar kështu turistin, deri sa forcat e policisë, zjarrfikëse dhe ato të policisë pyjore arritën ta shpëtonin pas më shumë se gjysëm ore. Nëpër rrjetet sociale qarkulluan foto të burrit që rrinte I varur në njërën anë të urës, ndërsa rreth tij dukeshin hapësirat ku më parë ishin panelet prej xhami. Sipas të dhënave, burri nuk pësoi dëmtime, por megjithatë u dërgua në spital për kontroll dhe mbështetje psikologjike. Komentuesit e përshkruan ngjarjen si një makth, dukë vënë në pikëpyetje sigurinë e shumë urave të tilla prej xhami që janë ndërtuar vitet e fundit në Kinë. Urat e xhamta janë një atraksion I madh turistik në vend, me më të famshmen në parkun kombëtar në Zhang-jiaje në provincën Hunan, që zgjatet për 430 metra, në një lartësi prej 300 metrash.