Presidenti Joe Biden të enjten mbrëma përdori sallën e Kongresit dhe fjalimin e tij më të madh të vitit, për të dhënë një mesazh të qartë politik se demokracia është nën kërcënim brenda dhe jashtë vendit. Ai e kanalizoi mesazhin e tij përmes prizmit të Donald Trump, duke iu referuar 'paraardhësit të tij' plot 13 herë, por pa e shqiptuar asnjëherë emrin e tij. Ai e sulmoi atë për Rusinë, për të drejtat riprodhuese, për kujdesin shëndetësor, për krizën në kufi, për kontrollin e armëve, për sulmin e 6 janarit dhe për trajtimin e pandemisë. "Një paraardhësi im, dështoi në detyrën më themelore presidenciale, detyrën për t'u kujdesur për popullin amerikan," tha ai. "Unë mendoj se kjo është e pafalshme." Analistët thanë se ky ishte fjalimi më i anshëm i mbajtur ndonjëherë në kongres, pasi Biden, shfrytëzoi rastin, tetë muaj para zgjedhjeve, për të krahasuar veten vazhdimisht me rivalin e tij. Ai madje gjeti edhe një mënyrë për të shfrytëzuar 81 vitet që mban mbi shpinë, në avantazhin e tij. "Më kanë thënë se jam shumë i vjetër," tha ai. "I ri apo i vjetër, unë gjithmonë e kam ditur se cfarë rruge duhet ndjekur. Unë e kam njohur Yllin tonë polar: Vetë ideja e Amerikës është se ne të gjithë jemi krijuar të barabartë. 'Ndërsa unë kam parë nga e ardhmja, shtoi ai, të tjerë kanë parë prapa, në 'zemërim, hakmarrje e shpagim’. I gjendur jo në pozitë të mirë, në sondazhe, presidentit më të moshuar në historinë e shba-së, i duhet një shtytje në fushatën e tij. Dhe fjalimi para kombit, ishte një shans i mirë jo vetëm për të dhënë një mesazh, por edhe për të dëshmuar aftësinë dhe energjinë e tij në këtë detyrë. “Bashkëqytetarët e mi amerikanë”, tha Biden në fund të fjalimit, “Problemi me të cilin përballet kombi ynë, nuk është se sa vjec jemi ne, por sa të vjetra janë idetë tonë. Urrejtja, zemërimi, hakmarrja, ndëshkimi janë ndër idetë më të vjetra. Por nuk mund të udhëhiqet amerika me ide të hershme që na kthejnë vetëm prapa. "Për të udhëhequr Amerikën, vendin e mundësive, duhet një vizion për të ardhmen e asaj që Amerika mund dhe duhet të jetë."