Ukraina goditi me një raketë anijen Konstantin Olshansky, të cilën Rusia ia rrëmbeu asaj në vitin 2014, tha të martën në mëngjes zëdhënësi i marinës ukrainase, Dmytro Pletenchuk. "Aktualisht, kjo anije nuk është e aftë për luftim," tha Pletenchuk në televizionin kombëtar. Ndërkohë nuk ka patur asnjë koment të nga Rusia. Rusia mori Konstantin Olshansky nga Ukraina, së bashku me pjesën më të madhe të flotës modeste të Kievit, kur trupat e saj pushtuan gadishullin e Krimesë në 2014. "Ajo i ishte nënshtruar rinovimit dhe po përgatitej për përdorim kundër Ukrainës, kështu që për fat të keq u mor vendimi për të goditur këtë anije," tha Pletenchuk. Ai shtoi se për këtë është përdorur një raketë anti-anije Neptun e prodhimit ukrainas. Ukraina, e cila ende kontrollon disa qindra kilometra të vijës bregdetare të Detit të Zi, pavarësisht pushtimit rus të disa prej rajoneve të saj jugore, nuk ka ndonjë anije luftarake të madhe. Megjithatë, ajo ka kryer një sërë sulmesh të suksesshme mbi flotën ruse të Detit të Zi në muajt e fundit duke përdorur raketa ose dronë detar. Ushtria e Ukrainës pretendoi se ka sulmuar dy anije të tjera ruse në Krime të dielën.