Ndryshe nga partnerët e tjerë të NATO-s Gjermania ka refuzuar deri më tani ta furnizojë Ukrainën me armë. Por qeveria gjermane mori së fundmi një kërkesë zyrtare nga Kievi. Ambasada e Ukrainës ka kërkuar zyrtarisht mbështetje në formën e furnizimeve me armë nga Berlini. Gazeta gjermane "Süddeutsche Zeitung" (Zidojçe Cajtung) citon nga një letër drejtuar Ministrisë së Jashtme në të cilën ambasada liston një numër armësh që dëshiron Ukraina. Në letër thuhet se për shkak të "situatës jashtëzakonisht të tensionuar të sigurisë dhe kërcënimit të agresionit rus", ambasada kërkon që "kjo kërkesë të shqyrtohet sa më shpejt të jetë e mundur", thuhet në artikullin e "Süddeutsche Zeitung". Ambasada e Ukrainës në Berlin kërkon sisteme për mbrojtjen kundërajrore ndaj raketave me rreze të mesme veprimi, sisteme kundërajrore portative, armë kundër dronëve, sisteme për shkatërrimit me mikrovalë, sisteme elektronike gjurmimi, por edhe pajisje për shikimin e natës, kamera vëzhgimi dhe municione.