Sulmet me dronë të Ukrainës gjatë natës në rajonet Kursk dhe Voronezh të Rusisë shkaktuan zjarre në ndërtesa banimi dhe ndërprenë trafikun në një autostradë kryesore, thanë zyrtarët rajonalë të hënën në mëngjes. Njësitë ruse të mbrojtjes ajrore shkatërruan gjithsej 162 dronë ukrainas gjatë natës, duke rrëzuar 57 prej tyre mbi rajonin e Kurskut që kufizohet me Ukrainën. Mbetjet që binin nga dronët e shkatërruar në rajonin Kursk shkaktuan zjarre në disa shtëpi dhe dëmtuan apartamente private, tha guvernatori në detyrë i rajonit, Alexander Khinshtein, në aplikacionin e mesazheve Telegram. Në rajonin jugor rus të Voronezhit, ku njësitë ajrore ruse shkatërruan 16 dronë ukrainas, guvernatori rajonal Alexander Gusev tha se mbetjet e dronëve prenë linjat e energjisë të cilat ranë në një autostradë kryesore. Një pjesë e autostradës, e cila lidh qytetet e Moskës, Voronezhit, Rostov-on-Donit dhe Krasnodarit, u mbyll, tha Gusev. Sulmet pasojnë blitzin e pabesueshëm të Kievit mbi bazat ajrore të rusisë, ku raportohet se janë shkatërruar rreth 40 bombardues rusë që përdoreshin për të kryer sulme mbi Ukrainë. Por, edhe Rusia nuk ka qëndruar duarlidhur dhe sipas zyrtarëve rajonalë ukrainas, pesë persona janë vrarë në sulmet gjatë natës në zaporizhia dhe disa të tjerë janë plagosur në Harkiv. Të paktën gjashtë persona u lënduan në rajonin verilindor të sumit, mes të cilëve edhe dy fëmijë – thanë zyrtarët rajonalë. Sulmet vijnë ndërsa Rusia dhe Ukraina janë gati të takohen për një raund bisedimesh paqeje, duke u përpjekur të gjejnë një mënyrë për t'i dhënë fund luftës që Rusia nisi me një pushtim të plotë ndaj fqinjit të saj më të vogël më shumë se tre vjet më parë.